Atha vā pātimokkheti nipphādetabbe bhummaṃ yathā "cetaso avūpasamo ayoniso manasikārapadaṭṭhānan"ti tena pātimokkhena sādhetabbo anūpavādo anūpaghāto pātimokkhasaṃvarasaṅgahito anūpavādo anūpaghāto icceva attho. Saṃvaroti iminā pana satisaṃvaro ñāṇasaṃvaro khantisaṃvaro vīriyasaṃvaroti imesaṃ catunnaṃ saṃvarānaṃ gahaṇaṃ, pātimokkhasādhanaṃ idaṃ saṃvaracatukkaṃ.

Mattaññutā ca bhattasminti pariyesanapaṭiggahaṇaparibhogavissajjanānaṃ vasena bhojane pamāṇaññutā. Pantañca sayanāsananti bhāvanānukūlaṃ araññarukkhamūlādivivittasenāsanaṃ. Adhicitte ca āyogoti sabbacittānaṃ adhikattā uttamattā adhicittasaṅkhāte arahattaphalacitte sādhetabbe tassa nipphādanatthaṃ samathavipassanā- bhāvanāvasena āyogo. Etaṃ buddhānasāsananti etaṃ parassa anūpavādanaṃ, anūpaghātanaṃ, pātimokkhasaṃvaro, pariyesanapaṭiggahaṇādīsu mattaññutā, vivittavāso,

Evaṃ imāya gāthāya tisso sikkhā kathitāti veditabbā.

Chaṭṭhasuttavaṇṇanā niṭṭhitā.