@3 cha.Ma. cātakasakuṇaṃ, Sī. bāsamānasakuṇaṃ, i. bāsasakuṇaṃ 4 cha.Ma.,

@i. phussa...evamuparipi 5 cha.Ma. tilaṃ Phalaṃ vā āmasati, pussamattikāya vā sammālimpati, pussasāṭakaṃ vā nivāseti, pussaveṭṭhanaṃ vā dhāreti, yaṃ vā panaññampi kiñci evarūpaṃ abhimaṅgalasammataṃ gandhaṃ vā ghāyati, rasaṃ vā sāyati, phoṭṭhabbaṃ vā phusati, idaṃ vuccati mutamaṅgalan"ti. Tassāpi vacanaṃ ekacce aggahesuṃ, ekacce nāggahesuṃ.

Tattha na diṭṭhamaṅgaliko sutamutamaṅgalike asakkhi saññāpetuṃ, na tesaṃ aññataro itare dve. Tesu ca manussesu ye diṭṭhamaṅgalikassa vacanaṃ gaṇhiṃsu, te "diṭṭhaṃyeva maṅgalan"ti gatā. Ye sutamutamaṅgalikānaṃ, te "sutaṃyeva mutaṃyeva maṅgalan"ti gatā. Evamayaṃ maṅgalakathā sakalajambūdīpe pākaṭā jātā.

Atha sakalajambūdīpe manussā gumbagumbā hutvā "kinnukho maṅgalan"ti maṅgalāni cintayiṃsu. Tesaṃ manussānaṃ ārakkhadevatā taṃ kathaṃ sutvā tatheva maṅgalāni cintayiṃsu, tāsaṃ devatānaṃ bhummadevatā mittā honti, atha tato sutvā bhummadevatāpi tatheva maṅgalāni cintayiṃsu, tāsampi devatānaṃ ākāsaṭṭhakadevatā mittā honti, ākāsaṭṭhakadevatānampi cātummahārājikā devatā mittā honti, eteneva upāyena yāva sudassīdevatānaṃ akaniṭṭhadevatā mittā honti, atha tato sutvā akaniṭṭhadevatāpi tatheva gumbagumbā hutvā maṅgalāni cintayiṃsu. Evaṃ yāva dasasahassacakkavāḷesu sabbattha maṅgalacintā udapādi. Uppannā ca "idaṃ maṅgalaṃ idaṃ maṅgalan"ti vinicchayamānāpi appattā eva vinicchayaṃ dvādasa vassāni aṭṭhāsi. Sabbe manussā ca devā ca brahmamāno ca ṭhapetvā ariyasāvake diṭṭhasutamutavasena tidhā bhinnā, ekopi "idameva maṅgalan"ti yathābhuccato niṭṭhaṅgato nāma nāhosi, maṅgalakolāhalaṃ loke uppajji.