Aṭṭhime bhikkhave mahāsamuddeti so anusandhi? yvāyaṃ aparisaddhāya parisāya pātimokkhassa anuddeso vutto, so imasmiṃ dhammavinaye acchariyo abbhutadhammoti taṃ aparehi sattahi acchariyabbhutadhammehi saddhiṃ vibhajitvā dassetukāmo paṭhamaṃ tāva tesaṃ upamābhāvena mahāsamudde aṭṭha acchariyabbhutadhamme dassento satthā "aṭṭhime bhikkhave mahāsamudde"tiādimāha.

Pakatidevā viya na suranti na isanti na virocantīti asuRā. Surā nāma devā, tesaṃ paṭipakkhāti vā asurā, vepacittipahārādādayo. Tesaṃ bhavanaṃ sinerussa heṭṭhābhāge, te tattha pavisantā nikkhamantā sinerupāde maṇḍapādiṃ nimminitvā kīḷantāva abhiramanti. Tattha tesaṃ abhiratiyā ime guṇe disvāti āha "ye disvā disvā asurā mahāsamudde abhiramantī"ti. Tattha abhiramantīti ratiṃ vindanti, anukkaṇṭhamānā vasanatīti attho.

Anupubbaninnotiādīni sabbāni padāni anupaṭipāṭiyā ninnabhāvasseva vevacanāni. Nāyatakeneva papātatoti na chinnataṭo mahāsobbho viya ādito eva papāto. So hi tīradesato paṭṭhāya ekaṅguladvaṅgula- vidatthiratanayaṭṭhiusabhaaḍḍhagāvutayojanādivasena gambhīro hutvā gacchanto gacchanto sinerupādamūle caturāsītiyojanasahassagambhīro hutvā ṭhitoti dasseti.

Ṭhitadhammoti ṭhitasabhāvo avaṭṭhitasabhāvo. Na matena kuṇapena saṃvasatīti yena kenaci hatthiassādīnaṃ kaḷevarena saddhiṃ na saṃvasati. Tīraṃ vāhetīti tīraṃ apaneti. Thalaṃ ussāretīti hatthena gahetvā viya vīcippakāreneva thale khipati. Gaṅgā yamunāti anotattadahassa dakkhiṇamukhato nikkhantanadī pañcadhārā hutvā pavattaṭṭhāne gaṅgātiādinā pañcadhā saṅkhaṃ gatā.