kusalo amāradheyyassā"ti.

Tasmā paṭhamaṃ asevitabbaṃ ācikkhanto āha "asevanā ca bālānan"ti, sevitabbaṃ ācikkhanto āha "paṇḍitānañca sevanā"ti. Vijahitabbamaggo viya hi paṭhamaṃ bālā na sevitabbā na payirupāsitabbā, tato gahetabbamaggo viya paṇḍitā sevitabbā payirupāsitabbāti. Kasmā pana bhagavatā maṅgalaṃ kathentena paṭhamaṃ bālānamasevanā paṇḍitānañca sevanā kathitāti? vuccate:- yasmā imaṃ diṭṭhādīsu maṅgaladiṭṭhiṃ bālānaṃ sevanāya devamanussā gaṇhiṃsu, sā ca amaṅgalaṃ, tasmā tesaṃ taṃ idhalokaparalokatthabhañjakaṃ akalyāṇamittasaṃsaggaṃ garahantena ubhayalokatthasādhakañca kalyāṇamittaṃ saṃsaggaṃ pasaṃsantena bhagavatā paṭhamaṃ bālānaṃ asevanā paṇḍitānañca sevanā kathitāti.

Tattha bālā nāma yekeci pāṇātipātādidasaakusalakammapathasamannāgatā sattā, te tīhākārehi jānitabbā. Yathāha "tīṇimāni bhikkhave bālassa bālalakkhaṇānī"ti suttaṃ. Apica pūraṇakassapādayo cha satthāro devadatta- kokālikakaṭamoraka tissakhaṇḍadeviyāputtasamuddadattaciñcamāṇavikādayo atītakāle ca dīghavidassa bhātāti ime aññe ca evarūpā sattā bālāti veditabbā.

Te aggipadittamiva agāraṃ attanā duggahitena attānañca attano vacanakārake ca vināsenti. Yathā dīghavidassa bhātā catubuddhantaraṃ saṭṭhīyojanamattena attabhāvena uttāno patito mahāniraye paccati, yathā ca tassa diṭṭhiṃ abhirucitāni