@3 cha.Ma. na ittaranti Paṇḍitena. Bālo hi manasikarontopi jānituṃ na sakkoti. Saṃvohārenāti kathanena.

Yo hi koci manussesu vohāraṃ upajīvati

evaṃ vāseṭṭha jānāhi vāṇijo so na brāhmaṇoti ettha hi vāṇijjaṃ vohāro nāma, "cattāro ariyavohārā"ti ettha cetanā. "saṅkhā samaññā paññatti vohāro"ti ettha paññatti. "vohāramattena so vohareyyā"ti ettha kathā vohāro. Idhāpi so eva adhippeto. Ekaccassa hi sammukhākathā parammukhākathāya na sameti, parammukhākathā sammukhākathāya, tathā purimakathā pacchimakathāya, pacchimakathā ca purimakathāya. So kathentoyeva sakkā jānituṃ "asuci eso puggalo"ti. Sucisīlassa pana purimaṃ pacchimena pacchimañca purimena, sammukhā kathitañca parammukhā kathitena, parammukhā kathitañca sammukhā kathitena sameti, tasmā kathentena sakkā sucibhāvo jānitunti pākāsento āha "saṃvohārena soceyyaṃ veditabban"ti.

Thāmoti ñāṇathāmo. Yassa hi ñāṇathāmo natthi, so uppannesu upaddavesu gahetabbagahaṇaṃ kattabbakiccaṃ apassanto advārikaṃ gharaṃ paviṭṭho viya carati. Tenāha "āpadāsu kho mahārāja thāmo veditabbo"ti. Sākacchāyāti saha kathāya. Duppaññassa hi kathā udake geṇḍu viya uppalavati. Paññavato kathentassa paṭibhānaṃ anantaṃ hoti. Udakavipphanditeneva hi maccho khuddako mahanto vāti paññāyati.