Athekadivasaṃ āyasmā ānando divāṭṭhāne nisinno bhagavato ca ariyasaṃghassa ca sammāpaṭipattiṃ paccavekkhitvā pītisomanassajāto "kathaṃ nu kho titthiyānan"ti tesaṃ paṭipattiṃ āvajjesi. Athassa nesaṃ sabbathāpi duppaṭipattiyeva upaṭṭhāsi. So "evaṃmahānubhāve nāma puññūpanissayassa sammāpaṭipattiyā ca ukkaṃsapāramippatte bhagavati, ariyasaṃghe ca dharante kathaṃ ime aññatitthiyā evaṃ duppaṭipannā akatapuññā varākā lābhino sakkatā bhavissantī"ti titthiyānaṃ lābhasakkārahāniṃ nissāya kāruññaṃ uppādetvā atha attano parivitakkaṃ "yāvakīvañca bhante"tiādinā bhagavato ārocesi. Bhagavā ca taṃ "ānanda tayā micchā parivitakkitan"ti avatvā suvaṇṇāliṅgasadisaṃ gīvaṃ unnāmetvā supupphitasatapattasassirīkaṃ mahāmukhaṃ abhippasannataraṃ katvā "evametaṃ ānandā"ti sampahaṃsitvā "yāvakīvañcā"tiādinā tassa vacanaṃ paccanumodi. Tena vuttaṃ

Bhikkhusaṃgho cā"ti. Atha bhagavā tassa aṭṭhuppattiyaṃ atītepi mayi anuppanne ekacce nīcajanā sammānaṃ labhitvā mama uppādato paṭṭhāya hatalābhasakkārā ahesunti bāverujātakaṃ kathesi.

Etamatthaṃ vitvāti diṭṭhigatikānaṃ tāva sakkārasammāno yāva na sammāsambuddhā loke uppajjanti, tesampana uppādato paṭṭhāya te hatalābhasakkārā nippabhā nittejāva honti, duppaṭipattiyā dukkhato ca na muccantīti etamatthaṃ sabbākārato viditvā tadatthadīpakaṃ imaṃ udānaṃ udānesi.

Tattha obhāsati tāva so kimīti so khajjūpanakakimi tāvadeva obhāsati jotati dippati. Yāva na uṇṇamate pabhaṅkaroti tīsupi mahādīpesu ekakkhaṇe ālokakaraṇena "pabhaṅkaro"ti laddhanāmo sūriyo yāva na uggamati na udeti. Anuggate hi sūriye laddhobhāsā khajjūpanakā viparivattamānāpi kaṇṭakaphalasadisā tamasi vijjotanti. Verocanamhi uggate, hatappabho hoti na cāpi bhāsatīti samantato andhakāraṃ vidhamitvā kiraṇasahassena virocanasabhāvatāya verocananāmake ādicce uṭṭhite so khajjūpanako hatappabho nittejo kāḷako hoti, rattandhakāre viya na bhāsati dippati.