Passatha noti passatha nu. Na ca sā samāpatti sulabharūpā, yā tena bhikkhunā asamāpannapubbāti rūpasamāpatti arūpasamāpatti brahmavihārasamāpatti nirodhasamāpatti phalasamāpattīti evaṃ pabhedā sāvakasādhāraṇā yā kāci samāpattiyo nāma, tāsu ekāpi samāpatti na sulabharūpā, dullabhā, natthiyeva sā tena lakuṇṭakabhaddiyena bhikkhunā asamāpannapubbā. Etenassa yaṃ vuttaṃ "mahiddhiko mahānubhāvo"ti, tattha mahiddhikataṃ pakāsetvā idāni mahānubhāvataṃ pakāsetuṃ "yassa catthāyā"tiādimāha. Taṃ heṭṭhā vuttanayameva. Ettha ca bhagavā "eso bhikkhave bhikkhū"tiādinā "bhikkhave ayaṃ bhikkhu na yo vā so vā dubbaṇṇo duddasiko okoṭimakoti bhikkhūnaṃ piṭṭhito piṭṭhito āgacchatīti ca ettakena na oñātabbo, atha kho mahiddhiko mahānubhāvo, yaṅkiñci sāvakena pattabbaṃ, sabbantaṃ tena anuppattaṃ, tasmā taṃ pāsāṇacchattaṃ viya garuṃ katvā oloketha, taṃ vo dīgharattaṃ hitāya sukhāya bhavissatī"ti dasseti.

Etamatthaṃ viditvāti etaṃ āyasmato lakuṇṭakabhaddiyassa mahiddhikatāmahānubhāvatādibhedaṃ guṇarāsiṃ sabbākārato jānitvā tadatthadīpakaṃ imaṃ udānaṃ udānesi.

Tattha nelaṅgoti elaṃ vuccati doso, nāssa elanti nelaṃ. Kimpana taṃ? suparisuddhasīlaṃ. Taṃ hi niddosaṭṭhena idha "nelan"ti adhippetaṃ. Taṃ nelaṃ padhānabhūtaṃ aṅgaṃ etassāti nelaṅgo. So yaṃ "ratho"ti vakkhati, tena sambandho, tasmā suparisuddhasīlaṅgoti attho. Arahattaphalasīlaṃ hi idhādhippetaṃ. Seto pacchādo etassāti setapacchādo. Pacchādoti rathassa upari attharitabbakambalādi. So pana suparisuddhadhavalabhāvena seto vā hoti rattanīlādīsu vā aññataro. Idha pana arahattaphalavimuttiyā adhippetattā suparisuddhabhāvaṃ upādāya "setapacchādo"ti vuttaṃ yathā aññatrāpi "ratho sīlaparikkhāro"ti. Eko satisaṅkhāto aro etassāti ekāro. Vattatīti pavattati. Rathoti therassa attabhāvaṃ sandhāya vadati.