Ettha udānentena bhagavatā "bhikkhave"ti ālapane kāraṇaṃ heṭṭhā vuttanayeneva veditabbaṃ.

Iti satthā "atthi bhikkhave ajātaṃ abhūtaṃ akataṃ asaṅkhatan"ti vatvā tattha hetuṃ dassento "no cetaṃ bhikkhave"tiādimāha. Tassāyaṃ saṅkhepattho:- bhikkhave yadi ajātādisabhāvā asaṅkhatā dhātu na abhavissa na siyā, idha loke jātādisabhāvassa rūpādikkhandhapañcakasaṅkhātassa saṅkhatassa nissaraṇaṃ anavasesavūpasamo na paññāyeyya na upalabbheyya na sambhaveyya. Nibbānaṃ hi ārammaṇaṃ katvā pavattamānā sammādiṭṭhiādayo ariyamaggadhammā anavasesakilese samucchindanti. Tenettha sabbassapi vaṭṭadukkhassa appavatti apagamo nissaraṇaṃ paññāyati.

Evaṃ byatirekavasena nibbānassa atthibhāvaṃ dassetvā idāni anugamavasenapi taṃ dassetuṃ "yasmā ca kho"tiādi vuttaṃ. Taṃ vuttatthameva. Ettha ca yasmā "appaccayā dhammā asaṅkhatā dhammā, atthi bhikkhave tadāyatanaṃ, yattha neva paṭhavī, idampi kho ṭhānaṃ duddasaṃ yadidaṃ sabbasaṅkhārasamatho sabbūpadhipaṭinissaggo, asaṅkhatañca vo bhikkhave dhammaṃ desissāmi asaṅkhatagāminiñca paṭipadan"tiādīhi anekehi suttapadehi, "atthi bhikkhave ajātan"ti imināpi ca suttena nibbānadhātuyā paramatthato sambhavo sabbalokaṃ anukampamānena sammāsambuddhena desito, tasmā yadipi tattha apaccakkhakārīnampi viññūnaṃ kaṅkhā vā vimati vā natthiyeva. Ye pana paraneyyabuddhino puggalā, tesaṃ vimativinodanatthaṃ ayamettha adhippāyaniddhāraṇamukhena yuttivicāraṇā:- yathā?