"nābhikaṅkhāmi maraṇaṃ nābhikaṅkhāmi jīvitaṃ

kālañca paṭikaṅkhāmi nibbisaṃ bhatako yathā"ti. Bhagavāpissa āyusaṅkhāraṃ oloketvā parikkhīṇabhāvaṃ ñatvā "yassadāni tvaṃ dabba kālaṃ maññasī"ti āha.

Vehāsaṃ abbhuggantvāti ākāsaṃ abhiuggantvā, vehāsaṃ gantvāti attho. Abhisaddayogena hi idaṃ upayogavacanaṃ, attho pana bhummavasena veditabbo. Vehāsaṃ abbhuggantvā kiṃ akāsīti āha "ākāse antalikkhe pallaṅkena nisīditvā"tiādi. Tattha tejodhātuṃ samāpajjitvāti tejokasiṇacatutthajjhānasamāpattiṃ samāpajjitvā. Thero hi tadā bhagavantaṃ vanditvā tikkhattuṃ padakkhiṇaṃ katvā ekamantaṃ ṭhito "bhagavā kappasatasahassaṃ tumhepi saddhiṃ tattha tattha vasanto puññāni karonto imamevatthaṃ sandhāya akāsiṃ, svāyamattho ajja matthakaṃ patto, idaṃ pacchimadassanan"ti āha. Ye tattha puthujjanabhikkhū sotāpannasakadāgāmino ca, tesu ekaccānaṃ mahantaṃ kāruññaṃ ahosi, ekacce ārodanappattā ahesuṃ. Athassa bhagavā cittavāraṃ ñatvā "tenahi dabba mayhaṃ bhikkhusaṃghassa ca iddhipāṭihāriyaṃ dassehī"ti āha. Tāvadeva sabbo bhikkhusaṃgho sannipati. Athāyasmā dabbo "ekopi hutvā bahudhā hotī"tiādinā nayena āgatāni sāvakasādhāraṇāni sabbāni pāṭihāriyāni dassetvā puna ca bhagavantaṃ vanditvā ākāsaṃ abbhuggantvā ākāse paṭhaviṃ nimminitvā tattha pallaṅkena nisinno tejokasiṇasamāpattiyā