Paṭirūpadesavāso cātigāthāvaṇṇanā

[4] Evaṃ bhagavā "brūhi maṅgalamuttaman"ti ekaṃ ajjhesitopi appaṃ yācito bahudāyako uḷārapuriso viya ekāya gāthāya tīṇi maṅgalāni vatvā tato uttarimpi devatānaṃ sotukāmatāya maṅgalānaṃ atthitāya ca yesaṃ yesaṃ yaṃ yaṃ anukūlaṃ, te te satte tattha tattha maṅgale niyojetukāmatāya ca "paṭirūpadesavāso cā"ti ādīhi gāthāhi punapi anekāni maṅgalāni vuttumāraddho. Tattha paṭhamagāthāya tāva paṭirūpoti anucchaviko. Desoti gāmopi nigamopi nagarampi janapadopi yokoci sattānaṃ nivāsokāso. Vāsoti tattha nivāso. Pubbeti purā atītāsu jātīsu. Katapuññatāti upacitakusalatā. Attāti cittaṃ vuccati sakalo vā attabhāvo, sammāpaṇidhīti tassa attano sammā paṇidhānaṃ niyuñjanaṃ ṭhapananti vuttaṃ hoti. Sesaṃ vuttanayamevāti. Ayamettha padavaṇṇanā.

Atthavaṇṇanā pana evaṃ veditabbā:- paṭirūpadesavāso nāma yattha catasso parisā vicaranti, dānādīni puññakiriyāvatthūni vattanti, navaṅgasatthusāsanaṃ dippati, tattha nivāso sattānaṃ puññakiriyāya paccayattā maṅgalanti vuccati. Sīhaḷadīpapaviṭṭhakevaṭṭādayo cettha nidassanaṃ.

Aparo nayo:- paṭirūpadesavāso nāma bhagavato bodhimaṇḍappadeso dhammacakkappavattitappadeso dvādasayojanāya parisāya majjhe sabbatitthiyamataṃ bhinditvā yamakapāṭihāriyadassitagaṇḍām barukkhamūlappadeso devorohaṇappadeso, yo