@4 ka. sabbatitthayamadaṃ 5 cha.Ma.....kaṇḍamba.... Vā panaññopi sāvatthīrājagahādibuddhādhivāsappadeso, tattha nivāso sattānaṃ chaanuttariyappaṭilābhapaccayato maṅgalanti vuccati.

Aparo nayo 1-:- puratthimāya disāya kajaṅgalannāma nigamo, tassa parena mahāsālā, tato paraṃ paccantimā janapadā, orato majjhe. Dakkhiṇapuratthimāya disāya sallavatī nāma nadī, tato paraṃ paccantimā janapadā, orato majjhe. Dakkhiṇāya disāya setakaṇṇikaṃ nāma nigamo, tato paraṃ paccantimā janapadā, orato majjhe. Pacchimāya disāya thūnaṃ nāma brāhmaṇagāmo, tato paraṃ paccantimā janapadā, orato majjhe. Uttarāya disāya usīraddhajo nāma pabbato, tato paraṃ paccantimā janapadā, orato majjhe. Ayaṃ majjhimapadeso āyāmena tīṇi yojanasatāni, vitthārena aḍḍhateyyasatāni parikkhepena nava yojanasatāni honti, eso paṭirūpadeso nāma.

Ettha catunnaṃ mahādīpānaṃ dvisahassānaṃ parittadīpānañca issariyādhipaccakārakā cakkavattirājāno uppajjanti, ekaṃ asaṅkheyyaṃ kappasatahassañca pāramiyo pūretvā sāriputtamoggallānādayo mahāsāvakā uppajjanti, dve asaṅkheyyāni kappasatasahassañca pāramiyo pūretvā paccekasambuddhā ca, cattāri aṭṭha soḷasa vā asaṅkheyyāni kappasatasahassañca pāramiyo pūretvā sammāsambuddhā ca uppajjanti. Tattha sattā cakkavattirañño ovādaṃ gahetvā pañcasu sīlesu patiṭṭhāya saggaparāyanā honti. Tathā paccekasambuddhānaṃ ovāde patiṭṭhāya, sammāsambuddhasāvakānampana ovāde patiṭṭhāya saggaparāyanā nibbānaparāyanā ca honti. Tasmā tattha vāso imāsaṃ sampattīnaṃ paccayato maṅgalanti vuccati.