[5] Idāni bāhusaccañcāti ettha bāhusaccanti bahussutabhāvo. Sippanti yaṃ kiñci hatthakosallaṃ. Vinayoti kāyavācācittavinayanaṃ. Susikkhitoti suṭaṭhu sikkhito. Subhāsitāti suṭṭhu bhāsitā. Yāti aniyamaniddeso. Vācāti girā byappatho. Sesaṃ vuttanayamevāti. Ayamettha padavaṇṇanā.

Atthavaṇṇanā pana evaṃ veditabbā:- bāhusaccaṃ nāma yantaṃ "sutadharo hoti sutasannicayo"ti ca "idhekaccassa bahussutaṃ hoti, suttaṃ geyyaṃ veyyākaraṇan "ca evamādinā nayena satthusāsanadharattaṃ vaṇṇitaṃ, taṃ akusalappahānakusalādhigamahetuto anupubbena paramatthasaccasacachikiriyahetuto ca maṅgalanti vuccati. Vuttañhetaṃ bhagavatā:-

"sutavā ca kho bhikkhave ariyasāvako akusalaṃ pajahati, kusalaṃ bhāveti,

sāvajjaṃ pajahati, anavajjaṃ bhāveti, suddhamattānaṃ pariharatī"ti.