ceva paramatthasaccaṃ sacchikaroti, paññāya ca paṭivijjha passatī"ti.

Apica āgāriyabāhusaccampi yaṃ anavajjaṃ, taṃ ubhayalokahitasukhāvahanato maṅgalanti vehitabbaṃ.

Sippaṃ nāma āgāriyasippañca anāgāriyasippañca. Tattha āgāriyasippaṃ nāma yaṃ parapāṇūparodhavirahitamakusalavivajjitaṃ maṇikārasuvaṇṇakārakammādi, taṃ idha lokatthāvahanato maṅgalaṃ. Anāgāriyasippaṃ nāma cīvaravicāraṇacīvarasibbanādisamaṇa- parikkhārābhisaṅkharaṇaṃ, yantaṃ "idha bhikkhave bhikkhu yāni tāni sabrahmacārīnaṃ uccāvacāni kiṃkaraṇīyāni, tattha dakkho hotī"ti ādinā nayena tattha tattha saṃvaṇṇitaṃ, yaṃ "nāthakaraṇo dhammo"ti ca vututaṃ, taṃ attano ca paresañca ubhayalokahitasukhāvahanato maṅgalanti veditabbaṃ.

Vinayo nāma āgāriyavinayo ca anāgāriyavinayo ca. Tattha āgāriyavinayo nāma dasaakusalakammapathaviramaṇaṃ, so tattha asaṅkilesāpajjanena ācāraguṇavavatthāpanena ca susikkhito ubhayalokahitasukhāvahanato maṅgalaṃ. Anāgāriyavinayo nāma sattāpattikkhandhe anāpajjanaṃ, sopi vuttanayeneva susikkhito, catupārisuddhisīlaṃ vā anāgāriyavinayo, so yathā tattha patiṭṭhāya arahattaṃ pāpuṇāti, evaṃ sikkhanena susikkhito lokiyalokuttarasukhādhigamahetuto maṅgalanti veditabbo.