Idāni tato abhāyitabbabhāve kāraṇaṃ dassento "sukhassetan"tiādimāha. Tattha sukhasaddo "sukho buddhānaṃ uppādo, sukhā virāgatā loke"tiādīsu sukhamūle āgato. "yasmā ca kho mahāli rūpaṃ sukhaṃ sukhānupatitaṃ sukhāvakkantan"tiādīsu sukhārammaṇe. "yāvañcidaṃ bhikkhave na sukaraṃ akkhānena pāpuṇituṃ yāva sukhā saggā"tiādīsu sukhapaccayaṭṭhāne. "sukho puññassa uccayo"tiādīsu sukhahetumhi. "diṭṭhadhammasukhavihārā ete dhammā"tiādīsu abyāpajjhe. "nibbānaṃ paramaṃ sukhan"tiādīsu nibbāne. "sukhassa ca pahānā"tiādīsu sukhavedanāyaṃ. "adukkhamasukhaṃ santaṃ, sukhamicceva bhāsitan"tiādīsu upekkhāvedanāyaṃ. "dvepi mayā ānanda vedanā vuttā pariyāyena sukhā vedanā dukkhā vedanā"tiādīsu iṭṭhasukhe. "sukho vipāko puññānan"tiādīsu iddhivipāke. Idhāpi iṭṭhavipāke eva daṭṭhabbo. Iṭṭhassātiādīsu esitabbato aniṭṭhapaṭikkhepato ca iṭṭhassa, kamanīyato manasmiṃ ca kamanato pavisanato kantassa. Piyāyitabbato santappanato

@4 saṃ.kha. 17/60/57 5 Ma.u. 14/255/223 6 khu.dha. 25/118/38

@7 Ma.mū. 12/82/54-5 8 khu.dha. 25/203-4/52-3 Ma.Ma. 13/215-6 190,192