@12 Ma.i. paṭipajjāmi 13 i. atha ca pana 14 dī. pāṭi. 11/267/164 siṅgālakasutta

Apica yo mātāpitaro tīsu vatthūsu pasāduppādanena sīlasamādāpanena pabbajjāya vā uṭṭhahati, ayaṃ idha mātāpituupaṭṭhākānaṃ aggo, tassa taṃ mātāpituupaṭṭhānaṃ mātāpitūhi katassa upakārassa paccupakārabhūtaṃ anekesaṃ diṭṭhadhammikānaṃ samparāyikānañca atthānaṃ padaṭṭhānato maṅgalanti vuccati.

Puttadārassāti ettha attanā jātā pasutā puttāpi dhītaropi puttātveva saṅkhayaṃ gacchanti. Dārāti vīsatiyā bhariyānaṃ yākāci bhariyā. Puttā ca dārā ca puttadāraṃ, tassa puttadārassa. Saṅgahoti sammānanādīhi upakārakaraṇaṃ. Taṃ susaṃvihitakammantatādidiṭṭhadhammikahitahetuto maṅgalanti veditabbaṃ. Vuttañcetaṃ bhagavatā "pacchimā disā puttadārā veditabbā"ti ettha uddiṭṭhaṃ puttadāraṃ bhariyāsaddena saṅgaṇhitvā "pañcahi kho gahapatiputta ṭhānehi sāmikena pacchimā disā bhariyā paccupaṭṭhātabbā sammānanāya avimānanāya anaticariyāya issariyavossaggena alaṅkārānuppadānena. Imehi kho gahapatiputta pañcahi ṭhānehi sāmikena pacchimā disā bhariyā paccupaṭṭhitā pañcahi ṭhānehi sāmikaṃ anukampati, susaṃvihitakammantā ca hoti susaṅgahitaparijanā ca, anaticārinī ca sambhatamanurakkhati, dakkhā ca hoti analasā sabbakiccesū"ti. Ayaṃ vā aparo nayo:- saṅgahoti dhammikāhi dānapiyavacanatthacariyāhi saṅgaṇhanaṃ. Seyyathīdaṃ? uposathadivasesu paribbayadānaṃ nakkhatatadivasesu nakkhattadassāpanaṃ maṅgaladivasesu maṅgalakaraṇaṃ diṭṭhadhammikasamparāyikesu atthesu ovādānusāsananti. Taṃ pubbanayeneva diṭṭhadhammikahitahetuto dhammikattā samparāyikahitahetuto devatāhipi namassanīyabhāvahetuto ca maṅgalanti veditabbaṃ. Yathāha sakko devānamindo:-

"ye gahaṭṭhā puññakarā, sīlavanto upāsakā.