Anusayoti imāsu tīsu vedanāsu sukhāya vedanāya rāgānusayo anuseti, dukkhāya vedanāya paṭighānusayo, adukkhamasukhāya vedanāya avijjānusayo anuseti. Vuttañhetaṃ:-

"sukhāya kho āvuso visākha vedanāya rāgānusayo anusetī"tiādi.

Diṭṭhimānānusayā cettha rāgapakkhiyā kātabbā. Sukhābhinandanena hi diṭṭhigatikā "sassatan"tiādinā sakkāye abhinivisanti, mānajātikā ca mānaṃ jappenti "seyyohamasmī"tiādinā. Vicikicchānusayo pana avijjāpakkhiko kātabbo. Tathā hi vuttaṃ paṭiccasamuppādavibhaṅge "vedanāpaccayā vicikicchā"ti. Anusayānaṃ ca tattha tattha santāne appahīnabhāvena thāmagamanaṃ. Tasmā "sukhāya vedanāya rāgānusayo anusetī"ti maggena appahīnattā anurūpakāraṇalābhe uppajjanāraho rāgo tattha sayito viya hotīti attho. Esa nayo sesesupi.

Ṭhānanti kāyo cittañca vedanāya ṭhānaṃ. Vuttañhetaṃ:- "yaṃ tasmiṃ samaye kāyikaṃ sukhaṃ kāyasamphassajaṃ sātaṃ sukhavedayitaṃ yaṃ tasmiṃ samaye cetasikaṃ sukhaṃ cetosamphassajaṃ sātaṃ sukhavedayitan"ti ca.