Jātimaraṇamaccagāti evaṃ sammasanto vipassanāñānaṃ maggena ghaṭetvā maggaparamparāya arahattaṃ patto jātimaraṇaṃ atīto nāma hoti. Kathaṃ? sampatvā paramaṃ santinti paramaṃ uttamaṃ anuttaraṃ santiṃ sabbasaṅkhārūpasamaṃ nibbānaṃ adhigantvā. Evaṃbhūto ca kālaṃ kaṅkhati bhāvitattoti catunnaṃ ariyamaggānaṃ vasena bhāvanābhisamayanipphattiyā bhāvitakāyasīlacittapaññattā bhāvitatto maraṇaṃ jīvitañca anabhinandanto kevalaṃ attano khandhaparinibbānakālaṃ kaṅkhati udikkhati, na tassa katthaci patthanā hotīti. Tenāha:-

"nābhinandāmi maraṇaṃ nābhinandāmi jīvitaṃ

kālañca paṭikaṅkhāmi nibbisaṃ bhatako yathā"ti.

Aṭṭhamasuttavaṇṇanā niṭṭhitā.