"te nibbāpenti rāgaggiṃ niccaṃ asubhasaññino

dosaggiṃ pana mettāya nibbāpenti naruttamā

mohaggiṃ pana paññāya yāyaṃ nibbedhagāminī"ti āha. Tattha asubhasaññinoti dvattiṃsākāravasena ceva uddhumātakādivasena ca asubhabhāvanānuyogena asubhasaññino. Mettāyāti "so mettāsahagatena cetasā ekaṃ dinaṃ pharitvā viharatī"ti vuttāya mettābhāvanāya. Ettha ca asubhajjhānañca pādakaṃ katvā nibbattitaanāgāmimaggena rāgaggidosaggīnaṃ nibbāpanaṃ veditabbaṃ. Paññāyāti vipassanāpaññāsahitāya maggapaññāya. Tenevāha "yāyaṃ nibbedhagāminī"ti. Sā hi kilesakkhandhaṃ vinivijjhantī gacchati pavattatīti