@4 papañcasūdanī 2/22 idha ca passitabbaṃ 5 cha.Ma. ca saddo na dissati
Brahmacariyaṃ nāma methunaviratisamaṇadhammasāsanamaggānaṃ adhivacanaṃ. Tathā hi "abrahmacariyaṃ pahāya brahmacārī hotī"ti evamādīsu methunavirati brahmacariyanti vuccati. "bhagavati no āvuso brahamcariyaṃ vussatīti evamāvuso"ti evamādīsu samaṇadhammo. "na tāvāhaṃ pāpima parinibbāyissāmi, yāva me idaṃ brahmacariyaṃ na iddhañceva bhavissati phītañca vitthārikaṃ bāhujaññan"ti evamādīsu sāsanaṃ. "ayameva kho bhikkhave ariyo aṭṭhaṅgiko maggo brahmacariyaṃ. Seyyathīdaṃ? Sammādiṭṭhī"ti evamādīsu maggo. Idha pana ariyasaccadassanena parato maggassa saṅgahitattāva avasesaṃ sabbampi vaṭṭati. Tañcetaṃ uparūpari nānappakāravisesādhigama- hetuto maṅgalanti veditabbaṃ.
Ariyasaccāna dassanaṃ nāma kumārapaṇhe vuttānaṃ catunnaṃ ariyasaccānaṃ abhisamayavasena maggadassanaṃ, taṃ saṃsāradukkhavītikkamahetuto maṅgalanti vuccati.