Nibbānasacchikiriyā nāma idha arahattaphalaṃ nibbānanti adhippetaṃ. Tampi hi pañcagativānena vānasaññitāya taṇhāya nikkhantattā nibbānanti vuccati, tassa patti vā paccavekakhaṇā vā sacchikiriyāti vuccati. Itarassa pana nibbānassa ariyasaccānadassaneneva sacchikiriyā siddhā, tenetaṃ idha anadhippetaṃ evamesā nibbānasacchikiriyā ca diṭṭhadhammasukhavihārādihetuto maṅgalanti veditabbāti.

Evamimissā gāthāya tapo ca brahmacariyaṃ ca ariyasaccānadassanaṃ nibbānasacchikiriyāti cattāri maṅgalāni vuttāni. Maṅgalattañca nesaṃ tattha tattha vibhāvitamevāti.

Niṭṭhitā tapo cāti imissā gāthāya atthavaṇṇanā.