Evaṃ rūpā rasā saddā gandhā phassā ca kevalā.

Iṭṭhā dhammā aniṭṭhā ca nappavedhenti tādino.

Ṭhitacittaṃ vippamuttaṃ vayañcassānupassatī"ti.

Asokaṃ nāma khīṇāsavasseva cittaṃ. Tañhi yo "soko socanā socitattaṃ antosoko antoparisoko cetaso parinijjhāyitattan"ti ādinā nayena vuccati soko, tassa abhāvato asokaṃ. Keci nibbānaṃ vadanti, taṃ purimapadena nānusandhiyati. Yathā ca asokaṃ, evaṃ virajaṃ khemanti khīṇāsavasseva cittaṃ. Tañhi rāgadosamoharajānaṃ vigatattā virajaṃ, catūhi ca yogehi khemattā khemaṃ, yato etaṃ tena tenākārena tamhi pavattikkhaṇe gahetvā niddiṭṭhavasena tividhaṃ