ayaṃ hi paramatthasaṃgho saraṇanti gamanīyo, suttesu ca "āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā"ti vutto. Etaṃ pana saraṇaṃ gatassa aññasmimpi bhikkhusaṃghe vā bhikkhunīsaṃghe vā buddhappamukhe vā saṃghe sammatisaṃghe vā catuvaggādibhede vā ekapuggalepi vā bhagavantaṃ uddissa pabbajite vandanādikiriyāya saraṇagamanaṃ neva bhijjati na saṅkilissati, ayamettha viseso. Vuttāvasesantu imassa dutiyassa ca saraṇagamanassa bhedābhedādividhānaṃ pubbanayeneva veditabbaṃ. Ayantāva "dhammaṃ saraṇamiccādi, dvayepesa nayo mato"ti etassa atthavaṇṇanā.

Anupubbavavatthānakāraṇaniddeso

idāni anupubbavavatthāne, kāraṇañca viniddise iti ettha etesu ca tīsu saraṇagamanesu sabbasattānaṃ aggoti katvā paṭhamaṃ buddho, tappabhavato tadupadesitato ca anantaraṃ dhammo, tassa dhammassa ādhāraṇato tadāsevanato ca ante saṃgho, sabbasattānaṃ vā hite niyyojakoti katvā paṭhamaṃ buddho, tappabhavato tadupadesitato ca sabbasattānaṃ hitattā anantaraṃ dhammo, hitādhigamāya paṭipanno adhigatahito vāti katvā ante saṃgho, saraṇabhāvena vavatthapetvā pakāsitoti evaṃ anupubbavavatthāne kāraṇañca viniddise.

Upamāpakāsanā