[13] Evaṃ bhagavā asevanā ca bālānanti ādīhi dasahi gāthāhi aṭṭhatiṃsa maṅgalāni kathetvā idāni etāneva attanā vuttamaṅgalāni thunanto "etādisāni katvānāti imaṃ avasānagāthamabhāsi.

Tassāyaṃ atthavaṇṇanā:- etādisānīti īdisāni mayā vuttappakārāni bālānamasevanādīni. Katvānāti katvā. Katvāna katvā karitvāti hi atthato anaññaṃ. Sabbatthamaparājitāti sabbattha khandhakilesābhisaṅkhāradevaputtamārappabhedesu catūsu paccatthikesu ekenapi aparājitā hutvā, sayameva te cattāro māre parājitvāti vuttaṃ hoti. Makāro cettha padasandhikaraṇamattoti viññātabbo.

Sabbattha sotthiṃ gacchantīti etādisāni maṅgalāni katvā catūhi mārehi aparājitā hutvā sabbattha idhalokaparalokesu ṭhānacaṅkamādīsu ca sotthiṃ gacchanti, bālasevanādīhi ye uppajeyyuṃ āsavavighātapariḷāhā, tesaṃ abhāvā sotthiṃ gacchanti, anupaddavā anupasaggā khemino appaṭibhayā gacchantīti vuttaṃ hoti. Anunāsiko cettha gāthābandhasukhatthaṃ vuttoti veditabbo.

Tantesaṃ maṅgalamuttamanti iminā gāthāpadena bhagavā desanaṃ niṭṭhāpesi. Kathaṃ? evaṃ devaputta ye etādisāni karonti, te yasmā sabbattha