@12 cha.Ma. posessāma Kammaṃ karothā"ti. Tāpaso "sādhū"ti paṭisuṇi. Gopālakā dutiyadivase maggaṃ samaṃ katvā pupphehi okiritvā dhajapaṭākāni ussāpetvā turiyehi vajjamānehi assamaṃ āgatā. Tāpaso "bhaṇe mahāpuññā dārakā, appamādeneva vaḍḍhetha, vaḍḍhetvā ca aññamaññaṃ āvāhavivāhaṃ karotha, pañcagorasena rājānaṃ tosetvā bhūmibhāgaṃ gahetvā nagaraṃ māpetha, tattha kumāraṃ abhisiñcethā"ti vatvā dārake adāsi. Te "sādhū"ti paṭisuṇitvā dārake netvā posesuṃ.

Dārakā vuḍḍhimanvāya kīḷantā vivādaṭṭhānesu aññe gopāladārake hatthenapi pādenapi paharanti, te rodanti. "kissa rodathā"ti evaṃ mātāpitūhi puṭṭhā "ime nimmātāpitikā tāpasapositā amhe atīva paharantī"ti vadanti tato tesaṃ mātāpitaro "ime dārakā aññe dārake viheṭhenti dukkhāpenti, na ime saṅgahetabbā, ime vajjitabbā"ti āhaṃsu. Tato pabhūti kira so padeso "vajjī"ti vuccati, yojanasataparimāṇena. Atha naṃ padesaṃ gopālakā rājānaṃ tosetvā aggahesuṃ. Tattha pana nagaraṃ māpetvā soḷasavassuddesikaṃ kumāraṃ abhisiñcitvā rājānaṃ akaṃsu. Tāya cassa dārikāya saddhiṃ vāreyyaṃ katvā katikaṃ akaṃsu "na bāhirato dārikā ānetabbā, ito dārikā na kassaci dātabbā"ti. Tesaṃ paṭhamasaṃvāsena dve dārakā jātā dhītā ca putto ca, evaṃ soḷasakkhattuṃ dve dve jātā, tato tesaṃ dārakānaṃ yathākkamaṃ vaḍḍhentānaṃ ārāmuyyānanivāsanaṭṭhānaparivārasampattiṃ gahetuṃ appahontaṃ taṃ nagaraṃ tikkhattuṃ gāvuttantarena gāvuttantarena pākārena parikkhipiṃsu, tassa punappunaṃ visālikatattā vesālītveva nāmaṃ jātaṃ. Idaṃ vesālīvatthu.

Bhagavato nimantanaṃ

ayampana vesālī bhagavato uppannakāle iddhā vepullappattā ahosi. Tattha hi rājūnaṃyeva satta sahassāni satta satāni satta ca rājāno ahesuṃ. Tathā yuvarājasenāpatibhaṇḍāgārikappabhūtīnaṃ. Yathāha:-