ārāmasatāni satta ca ārāmā, satta ca pokkharaṇīsahassāni satta ca

pokkharaṇīsatāni satta ca pokkharaṇiyo"ti.

Sā aparena samayena dubbhikkhā ahosi dubbuṭṭhikā dussassā. Paṭhamaṃ duggatamanussā maranti, te bahiddhā chaḍḍenti. Matamanussānaṃ kuṇapagandhena amanussā nagaraṃ pavisiṃsu, tato bahutarā miyyanti. Tāya pāṭikulyatāya ca sattānaṃ ahivātakarogo uppajji. Iti tīhi dubbhikkhaamanussarogabhayehi upaddutāya vesāliyā nagaravāsino upasaṅkamitvā rājānamāhaṃsu "mahārāja imasmiṃ nagare tividhaṃ bhayaṃ uppannaṃ, ito pubbe yāva sattamā rājakulaparivaṭṭā evarūpaṃ anuppannapubbaṃ, tumhākaṃ maññe adhammikattenetarahi uppannan"ti. Rājā sabbe saṇṭhāgāre sannipātāpetvā "mayhaṃ adhammikabhāvaṃ vicinathā"ti āha. Te sabbaṃ paveṇiṃ vicinantā na kiñci addasaṃsu.

Tato rañño dosaṃ adisvā "idaṃ bhayaṃ amhākaṃ kathaṃ vūpasameyyā"ti cintayiṃsu. Tattha ekacce cha satthāre apadisiṃsu "etehi okkantamatte vūpasamessatī"ti. Ekacce āhaṃsu "buddho kira idha loke uppanno, so bhagavā sabbasattahitāya dhammaṃ deseti mahiddhiko mahānubhāvo, tena okkamantamatte sabbabhayāni vūpasameyyun"ti. Tena te attamanā hutvā "kahampana so bhagavā etarahi viharati, amhehi pesite āgaccheyyā"ti āhaṃsu. Athāpare āhaṃsu "buddhā nāma anukampakā, kissa nāgaccheyyuṃ so pana bhagavā etarahi rājagahe viharati, rājā ca bimbisāro upaṭṭhahati, kadāci so āgantuṃ na