@4 cha.Ma. adhammikattena taṃ etarahi 5 cha.Ma. okkantamatte

@6 cha.Ma. amhehi pesito na āgaccheyyāti 7 cha.Ma. rājā bimbisāro taṃ..., i. rājā

@ca naṃ bimbisāro 8 cha.Ma. ayaṃ saddo na dissati Dadeyyā"ti. "tenahi rājānaṃ saññāpetvā ānessāmā"ti dve licchavīrājāno mahatā balakāyena pahūtaṃ paṇṇākāraṃ datvā rañño santikaṃ pesesuṃ "bimbisāraṃ saññāpetvā bhagavantaṃ ānethā"ti. Te gantvā rañño paṇṇākāraṃ datvā taṃ pavattiṃ nivedetvā "mahārāja bhagavantaṃ amhākaṃ nagaraṃ pesehī"ti āhaṃsu. Rājā na sampaṭicchi, "tumheyeva jānāthā"ti āha. Te "sādhū"ti bhagavantaṃ upasaṅkamitvā vanditvā evamāhaṃsu "bhante amhākaṃ nagare tīṇi bhayāni uppannāni, sace bhagavā āgaccheyya, sotthi no bhaveyyā"ti. Tato bhagavā āvajjitvā "vesāliyaṃ ratanasutte vutte sā rakkhā koṭisatasahassānaṃ cakkavāḷānaṃ pharissati, suttapariyosāne caturāsītiyā pāṇasahassānaṃ dhammābhisamayo bhavissatī"ti adhivāsesi. Atha rājā bimbisāro bhagavato adhivāsanaṃ sutvā "bhagavatā vesālīgamanaṃ adhivāsitan"ti nagare ugghosanaṃ kārāpetvā bhagavantaṃ upasaṅkamitvā āha "kiṃ bhante sampaṭicchatha vesālīgamanan"ti. Āma mahārājāti. Tenahi bhante tāva āgametha, yāva maggaṃ paṭiyādemīti.