@Ma. koṭisatasahassacakkavāḷānaṃ 8 cha.Ma., i. ghosanaṃ 9 cha.Ma., i. antarā 10 cha.Ma.,

@i. vihāraṃ 11 cha.Ma. sāsanaṃ Karothā"ti. Te "diguṇaṃ pūjaṃ karissāmā"ti vesāliyā ca gaṅgāya ca antare tiyojanaṃ bhūmiṃ samaṃ katvā bhagavato cattāri cattāri ekamekassa ca bhikkhussa dve dve setacchattāni sajjitvā pūjaṃ kurumānā gaṅgātīraṃ āgantvā aṭṭhaṃsu.

Atha bimbisāro dve nāvāyo saṃghāṭtevā maṇḍapaṃ katvā pupphadāmādīhi alaṅkaritvā tattha sattaratanamayaṃ buddhāsanaṃ paññapesi, bhagavā tasmiṃ nisīdi. Pañcasatā bhikkhūpi nāvaṃ abhirūhitvā yathānurūpaṃ nisīdiṃsu. Rājā bhagavantaṃ anugacchanto galappamāṇaṃ udakaṃ orohitvā "yāva bhante bhagavā āgacchati, tāvāhaṃ idheva gaṅgātīre vasissāmī"ti vatvā nivatto. Upari devatā yāva akaniṭṭhabhavanaṃ pūjamakaṃsu. Heṭṭhā gaṅgānivāsino kambalassatarādayo nāgarājāno pūjamakaṃsu. Evaṃ mahatiyā pūjāya bhagavā yojanamattaṃ addhānaṃ gaṅgāya gantvā vesālikānaṃ sīmantaraṃ paviṭṭho.

Tato licchavīrājāno tena bimbisārena katapūjāya diguṇaṃ karontā galappamāṇe udake bhagavantaṃ paccuggacchiṃsu. Teneva khaṇena tena muhuttena vijjuppabhāvinaddhandhakāravisaṭakūto gaḷagaḷāyanto catūsu disāsu mahāmegho vuṭṭhāsi. Atha bhagavatā paṭhamapāde gaṅgāya tīre nikkhittamatte pokkharavassaṃ vassi. Ye temitukāmā, te eva tementi, ye atemitukāmā, te na tementi. Sabbattha jaṇṇukamattaṃ ūrumattaṃ kaṭimattaṃ galappamāṇaṃ udakaṃ vahati, sabbakuṇapāni udakena gaṅgāya pavesitāni, parisuddho bhūmibhāgo ahosi.