Evamimassa pacchābhattakiccassa lokavolokanasaṅkhāte catutthabhāgāvasāne buddhadhammasaṃghesu dānasīlauposathakammādīsu ca akatādhikāre ca katādhikāre ca anupanissayasampanne ca upanissayasampanne ca satte passituṃ buddhacakkhunā lokaṃ volokento kasibhāradvājaṃ brāhmaṇaṃ arahattupanissayasampannaṃ disvā "tattha mayi gate kathā pavattissati, tato kathāvasāne dhammadesanaṃ sutvā esa brāhmaṇo pabbajitvā arahattaṃ pāpuṇissatī"ti ca ñatvā tattha gantvā kathaṃ samuṭṭhāpetvā imaṃ suttaṃ abhāsi.

Tattha evamme sutantiādi āyasmatā ānandena paṭhamamahāsaṅgītikāle dhammasaṅgītiṃ karontena āyasmatā mahākassapattherena puṭṭhena pañcannaṃ arahantasatānaṃ vuttaṃ, "ahaṃ kho samaṇa kasāmi ca vappāmi cā"ti kasibhāradvājena vuttaṃ, "ahampi kho brāhmaṇa kasāmi ca vappāmi cā"tiādi bhagavatā vuttaṃ, tadetaṃ sabbampi samodhānetvā "kasibhāradvājasuttan"ti vuccati.

Tattha evanti ayaṃ ākāranidassanāvadhāraṇattho evaṃsaddo. Ākāratthena hi etena etamatthaṃ dīpeti:- nānānayanipuṇamanekajjhāsayasamuṭṭhānamatthabyañjanasampannaṃ vividhapāṭihāriyaṃ dhammatthadesanāpaṭivedhagambhīraṃ sabbasattehi sakasakabhāsānurūpa- mupalakkhaṇiyasabhāvaṃ tassa bhagavato vacanaṃ, taṃ sabbappakārena ko samattho viññātuṃ, atha kho evamme sutaṃ, mayāpi ekenākārena sutanti. Nidassanatthena "nāhaṃ sayambhū, na mayā idaṃ sacchikatan"ti attānaṃ parimocento "evamme sutaṃ, mayā evaṃ sutan"ti idāni vattabbaṃ sakalaṃ suttaṃ nidasseti. Avadhāraṇatthena "etadaggaṃ bhikkhave mama sāvakānaṃ bhikkhūnaṃ bahussutānaṃ yadidaṃ ānando, gatimantānaṃ, satimantānaṃ, dhitimantānaṃ, upaṭṭhākānaṃ yadidaṃ ānando"ti evaṃ bhagavatā pasatthabhāvānurūpaṃ attano dhāraṇabalaṃ dassento sattānaṃ sotukamyataṃ janeti "evamme sutaṃ tañca atthato vā byañjanato vā anūnamanadhikaṃ, evaṃ na aññathā daṭṭhabban"ti. Me sutanti ettha mayāsaddattho mesaddo, sotadvāraviññāṇattho sutasaddo. Tasmā evamme sutanti evaṃ mayā sotaviññāṇapubbaṅgamāya sotaviññāṇavīthiyā upadhāritanti vuttaṃ hoti.