@6 khu.u. 25/76/224 pāṭaligāmiyasutta, vinaYu. mahā. 5/636/64 Evamādīnaṃ sattānaṃ vasena yesu kayiranti, tesampi hitāti veditabbā. Evaṃ ubhayesampi hitāti veditabbā.

Evaṃ ubhayesampi hitabhāvaṃ dassento "mettaṃ karotha mānusiyā pajāyā"ti vatvā idāni upakāraṃ dassento āha "divā ca ratto ca haranti ye baliṃ, tasmā hi ne rakkhatha appamattā"ti.

Tassattho:- ye manussā cittakammakaṭṭhakammādīhipi devatā katvā cetiyarukkhādīni ca upasaṅkamitvā devatā uddissa divā ca baliṃ karonti, kāḷapakkhādīsu ca rattiṃ baliṃ karonti, salākabhattādīni vā datvā ārakkhadevatā upādāya yāva brahmadevatānaṃ pattidānaniyyātanena divā baliṃ karonti, chattāropanadīpamālāya sabbarattiṃ dhammassavanādīni kārāpetvā pattidānaniyyātanena ca rattiṃ baliṃ karonti, te kathaṃ na rakkhitabbā. Yato evaṃ divā ca ratto ca tumhe uddissa karonti ye baliṃ, tasmā hi ne rakkhathāti, tasmā balikammakaraṇāpi ne manusse rakkhatha gopatha, ahitañca nesaṃ apanetha, hitaṃ upanetha appamattā hutvā taṃ kataññubhāvaṃ hadaye katvā niccamanussarantāti.

Yaṃ kiñcīti gāthāvaṇṇanā