Ayaṃ pana adhippāyayojanā:- yathā koci nikkujjitaṃ ukkujjeyya, evaṃ saddhammavimukhaṃ asaddhammapatitaṃ maṃ asaddhammā vuṭṭhāpentena, yathā paṭicchannaṃ vivareyya, evaṃ kassapassa bhagavato sāsanantaradhānā pabhuti micchādiṭṭhigahanapaṭicchannaṃ sāsanaṃ vivarantena, yathā mūḷhassa maggaṃ ācikkheyya, evaṃ kummaggamicchāmaggapaṭipannassa me saggamokkhamaggaṃ ācikkhantena, yathā andhakāre telapajjotaṃ dhāreyya, evaṃ mohandhakāranimuggassa me buddhādiratanarūpāni apassato tappaṭicchādakamohandhakāraviddhaṃ sakadesanāpajjotadhāraṇena mayhaṃ bhotā gotamena etehi pariyāyehi desitattā anekapariyāyena dhammo pakāsito.

Atha vā ekacciyena matena yasmā ayaṃ dhammo dukkhadassanena ca asubhe "subhan"ti vipallāsappahānena ca nikkujjitukkujjitasadiso, samudayadassanena dukkhe "sukhan"ti vipallāsappahānena ca paṭicchannavivaraṇasadiso, nirodhadassanena anicce "niccan"ti vipallāsappahānena ca mūḷhassa maggācikkhanasadiso, maggadassanena anattani "attā"ti vipallāsappahānena ca andhakāre telapajjotasadiso tasmā seyyathāpi nāma nikkujjitaṃ vā ukkujjeyya .pe. Pajjotaṃ dhāreyya "cakkhumanto rūpāni dakkhantī"ti, evaṃ pakāsito hoti.

Yasmā panettha saddhātapakāyaguttatādīhi sīlakkhandho pakāsito hoti, paññāya paññākkhandho, hirimanaādīhi samādhikkhandho, yogakkhemena nirodhoti evaṃ tikkhandho ariyamaggo nirodho cāti sarūpeneva dve ariyasaccāni pakāsitāni, tattha maggo paṭipakkho samudayassa, nirodho dukkhassāti paṭipakkhena dve. Iti iminā pariyāyena cattāri ariyasaccāni pakāsitāni. Tasmā anekapariyāyena pakāsito hotīti veditabbo.