Na no samaṃ atthi tathāgatenāti naiti paṭisedhe. Noiti avadhāraṇe. Samanti tulyaṃ. Atthīti vijjati. Tathāgatenāti buddhena. Kiṃ vuttaṃ hoti? yaṃ etaṃ vittañca ratanañca pakāsitaṃ, ettha ekampi buddharatanasadisaṃ ratanaṃ nevatthi. Yampi hi taṃ vittaṃ cittikataṭṭhena ratanaṃ. Seyyathīdaṃ? rañño cakkavattissa cakkaratanaṃ maṇiratanañca, yamhi uppanne mahājano na aññattha cittikāraṃ karoti, na koci pupphagandhādīni gahetvā yakkhaṭṭhānaṃ vā bhūtaṭṭhānaṃ vā gacchati, sabbopi jano cakkaratanaṃ maṇiratanameva cittiṃ karoti pūjeti, taṃ taṃ varaṃ pattheti, patthitapatthitañcassa ekaccaṃ samijjhati, tampi ratanaṃ buddharatanena samaṃ natthi. Yadi hi cittikataṭṭhena ratanaṃ, tathāgatova ratanaṃ. Tathāgate hi uppanne yekeci mahesakkhā devamanussā na te aññatra cittikāraṃ karonti, na kiñci aññaṃ pūjenti. Tathā

@4 cha.Ma. atappakaṃ 5 cha.Ma. sattesu 6 cha.Ma. cittīkāraṃ karoti, i. cittikaroti Hi brahmā sahampati sinerumattena ratanadāmena tathāgataṃ pūjesi, yathābalañca aññe devā manussā ca bimbisārakosalarājaanāthapiṇḍikādayo. Parinibbutampi bhagavantaṃ uddissa channavutikoṭidhanaṃ visajjetvā asokamahārājā sakalajambūdīpe caturāsīti vihārasahassāni patiṭṭhāpesi, ko pana vādo aññesaṃ cittikārānaṃ. Apica kassapassa parinibbutassāpi jātibodhidhammacakkappavattanaparinibbānaṭṭhānāni paṭimācetiyādīni vā uddissa evaṃ cittīkāragarukāro pavattati yathā bhagavato. Evaṃ cittikaṭṭhenāpi tathāgatasamaṃ ratanaṃ natthi.

Tathā yampi taṃ mahagghaṭṭhena ratanaṃ. Seyyathāpi? kāsikavatthaṃ. Yathāha "jiṇṇampi bhikkhave kāsikavatthaṃ vaṇṇavantañceva hoti sukhasamphassañca mahagghañcā"ti 3-, tampi buddharatanena samaṃ natthi. Yadi hi mahagghaṭṭhena ratanaṃ, tathāgatova ratanaṃ. Tathāgato hi yesaṃ paṃsukūlampi paṭiggaṇhāti, tesantaṃ hoti. Mahapphalaṃ mahānisaṃsaṃ seyyathāpi asokassa rañño, idamassa mahagghatāya. Evaṃ mahagghaṭṭhenāpi tathāgatasamaṃ ratanaṃ natthi evaṃ mahagghatāya vacanena cettha dosābhāvasādhakaṃ idaṃ suttapadaṃ veditabbaṃ:-