Tena kho pana samayena aggikabhāradvājassāti yaṃ yaṃ avuttapubbaṃ, taṃ tadeva vaṇṇayissāma. Seyyathidaṃ? so hi brāhmaṇo aggiṃ juhati paricaratīti katvā aggikoti nāmena pākaṭo ahosi, bhāradvājoti gottena. Tasmā vuttaṃ "aggikabhāradvājassā"ti. Nivesaneti ghare. Tassa kira brāhmaṇassa nivesanadvāre antaravīthiyaṃ aggihutasālā ahosi. Tato "nivesanadvāre"ti vattabbe tassapi padesassa nivesaneyeva pariyāpannattāva. "nivesane"ti vuttaṃ. Samīpatthe vā bhummavacanaṃ, nivesanasamīpeti attho. Aggi pajjalito hotīti aggiyāpane ṭhito aggi kaṭṭharuddhāraṇe samīpe vā pakkhepaṃ vījanavātañca labhitvā pajjalito uddhaṃ samuggataccisamākulo hoti. Āhuti paggahitāti sasīsaṃ nhāyitvā mahatā sakkārena pāyāsasappimadhuphāṇitādīni abhisaṅkhatāni hontīti attho. Yaṃ hi kiñci aggimhi juhitabbaṃ, taṃ sabbaṃ "āhutī"ti vuccati. Sapadānanti anugharaṃ. Bhagavā hi sabbajanānuggahatthāya āhārasantuṭṭhiyā ca uccanīcakule avokkamma piṇḍāya carati. Tena vuttaṃ "sapadānaṃ piṇḍāya caramāno"ti.

@3 cha.Ma. maṅgalasuttavaṇṇanāyaṃ 4 cha.Ma. ādi

@5 cha.Ma. pariyāpannattā 6 cha. aggiyādhāne, Ma. aggisālaṭṭhāne