@2 Ma.u. 14/86/67 3 dī.pā. 11/349/240

@4 khu.jā. 28/50/20 (syā) 5 Ma.mū. 12/1/1 Tasmā manasikātabbo"ti. Sādhukapadaṃ vā ubhayapadehi saddhiṃ yojetvā "yasmā ayaṃ dhammo dhammagambhīro ca desanāgambhīro ca, tasmā suṇāhi sādhukaṃ, yasmā atthagambhīro ca paṭivedhagambhīro ca, tasmā sādhukaṃ manasikarohī"ti etamatthaṃ dīpento āha "suṇāhi sādhukaṃ manasikarohī"ti.

Tato "evaṃ gambhīre kathamahaṃ patiṭṭhaṃ labhissāmī"ti visīdantamiva taṃ brāhmaṇaṃ samussāhento āha "bhāsissāmī"ti. Tattha "yathā tvaṃ ñassasi, tathā parimaṇḍalehi padabyañjanehi uttānena nayena bhāsissāmī"ti evamadhippāyo veditabbo. Tato ussāhajāto hutvā "evaṃ bho"ti kho aggikabhāradvājo brāhmaṇo bhagavato paccassosi, sampaṭicchi paṭiggahesīti vuttaṃ hoti, yathānusiṭṭhaṃ vā paṭipajjanena abhimukho assosīti. Athassa "bhagavā etadavocā"ti etaṃ avoca, idāni vattabbaṃ sandhāya vuttaṃ "kodhano upanāhī"ti evamādikaṃ.