@9 cha.Ma., i. dasannaṃ dasannaṃ 10 Sī., i. muddhāraṃ Viya hoti, yassa nābhiyā ubhosu passesu dve sīhamukhāni honti, abbhantaraṃ sakaṭacakkasseva susiraṃ. Tassa kattā vā kāretā vā natthi, kammapaccayena utunā samuṭṭhāti. Yaṃ rājā dasavidhaṃ cakkavattivattaṃ pūretvā tadahuposathe puṇṇamīdivase sīsanhāto uposathiko uparipāsādavaragato sīlāni visodhento nisinno puññacandaṃ viya suriyaṃ viya ca uṭṭhentaṃ passati, yassa dvādasayojanato pabhūti saddo suyyati, tiyojanato vaṇṇo dissati, yaṃ mahājanena "dutiyo maññe cando vā suriyo vā uṭṭhito"ti ativiya kotuhalajātena dissamānaṃ nagarassa upari āgantvā rañño antepurassa pācīnapasse nātiuccaṃ nātinīcaṃ hutvā mahājanassa gandhapupphādīhi pūjituṃ yuttaṭṭhāne akkhāhataṃ viya tiṭṭhati.

Tadeva anubandhamānaṃ hatthiratanaṃ uppajjati, sabbaseto rattapādo sattappatiṭṭho iddhimā vehāsaṅgamo uposathakulā vā chaddantakulā vā āgacchati, uposathakulā ce āgacchanto sabbajeṭṭhako āgacchati, ce chaddantakulā sabbakaniṭṭho sikkhitasikkho damathūpeto, so dvādasayojanaṃ parisaṃ gahetvā sakalajambūdīpaṃ anusaṃyāyitvā pure pātarāsameva sakaṃ rājadhāniṃ āgacchati.

Tampi anubandhamānaṃ assaratanaṃ āgacchati, sabbaseto rattapādo kākasīso muñjakeso valāhakassarājakulā āgacchati. Sesamettha hatthiratanasadisameva.

Tampi anubandhamānaṃ maṇiratanaṃ uppajjati. So hoti maṇi veḷuriyo subho jātimā aṭṭhaṃso suparikammakato āyāmato lagganābhisadiso, vepullapabbatā āgacchati, so caturaṅgasamannāgatepi andhakāre rañño dhajaggato yojanaṃ obhāseti, yassobhāsena manussā "divā"ti maññamānā kammante payojenti, antamaso kuṇṭhakipillikampi upādāya passanti.