Sadevake bhikkhave loke .pe. Sadevamanussāya ayaṃ aggo

mahācoro, yo asantaṃ abhūtaṃ uttarimanussadhammaṃ ullapatī"ti.

Tattha lokiyacorā lokiyameva dhanadhaññādiṃ thenenti, sāsane vuttacoresu paṭhamo tathārūpaṃyeva cīvarādipaccayamattaṃ, dutiyo pariyattidhammaṃ, tatiyo parassa brahmacariyaṃ, catuttho saṃghikagarubhaṇḍaṃ, pañcamo jhānasamādhisamāpattimaggaphalappabhedaṃ lokiyalokuttaraguṇadhanaṃ lokiyañca cīvarādipaccayajātaṃ. Yathāha "theyyāya vo bhikkhave raṭṭhapiṇḍo bhutto"ti. Tattha yvāyaṃ pañcamo mahācoro, taṃ sandhāyāha bhagavā "coro sabrahamake loke"ti. So hi "sadevake bhikkhave loke .pe. Sadevamanussāya ayamaggo mahācoro hoti, yo asantaṃ abhūtaṃ uttarimanussadhammaṃ ullapatī"ti evaṃ lokiyalokuttaradhanathenanato aggo mahācoroti vutto, tasmā taṃ idhāpi "sabrahmake loke"ti iminā ukkaṭṭhaparicchedena pakāsesi.

Eso kho vasalādhamoti ettha khoti avadhāraṇattho, tena eso eva vasalādhamo, vasalānaṃ hīno sabbapacchimakoti avadhāreti. Kasmā? visiṭṭhavatthumhi theyyadhammavassanato, yāva taṃ paṭiññaṃ na vissajjeti, tāva adhigatavasalakaraṇo vasalako vāti.