saṅkāracoḷaṃ paṭimuñca kaṇṭhe

ko re tuvaṃ hosi adakkhiṇeyyo"ti.

Brāhmaṇā "gaṇhatha gaṇhathā"ti taṃ gahetvā ākoṭetvā anayabyasanaṃ pāpesuṃ. So ākāsena gantvā bahinagare paccuṭṭhāsi. Devatā kupitā kumāraṃ gale gahetvā uddhaṃpādaṃ adhosiraṃ ṭhapesuṃ, so akkhīhi niggatehi mukhena kheḷaṃ paggharantena ghurughurupassāsī dukkhaṃ vedayati. Diṭṭhamaṅgalikā sutvā "koci āgato atthī"ti pucchi. Āma pabbajito āgañchīti. Kuhiṃ gatoti. Evaṃ gatoti. Sā tattha gantvā "khamatha bhante attano dāsassā"ti yācantī tassa pādamūle bhūmiyā nipajji. Tena ca samayena mahāpuriso piṇḍāya caritvā yāguṃ labhitvā taṃ pivanto tattha nisinno hoti, so avasiṭṭhaṃ thokaṃ yāguṃ diṭṭhamaṅgalikāya adāsi "gacchimaṃ yāguṃ udakakumbhiyā āloletvā yesaṃ bhūtavikāro atthi, tesaṃ akkhimukhakaṇṇanāsābilesu āsiñca, sesasarīraṃ ca paripphosehi, evaṃ nibbikārā bhavissantī"ti āha. Sā tathā akāsi. Tato kumāre pakatisarīre jāte "ehi tāta maṇḍabya taṃ khamāpessāmā"ti puttaṃ ca sabbe brāhmaṇe ca tassa pādamūle nikkujjetvā nipajjāpetvā khamāpesi.

So "sabbajanassa dānaṃ dātabban"ti ovaditvā dhammakathaṃ katvā attano vasanaṭṭhānaṃyeva gantvā cintesi "itthīsu pākaṭā diṭṭhamaṅgalikā damitā, purisesu