@5 cha.Ma. ayaṃ pāṭho na dissati 6 cha.Ma. asati antarāyeti Vanasaṇḍaṃ pavisitvā sabbarattindivaṃ āraddhavīriyā hutvā yāmagaṇḍikaṃ koṭṭetvā yonisomanasikārabahulā viharantā rukkhamūlāni upagantvā nisīdanti. Sīlavantānaṃ bhikkhūnaṃ tejena vihatatejā rukkhadevatā attano attano vimānā oruyha dārake gahetvā ito cito ca vicaranti. Seyyathāpi nāma rājūhi vā rājamahāmattehi vā gāmakāvāsaṃ gatehi gāmavāsīnaṃ ghare okāse gahite gharamānusakā gharā nikkhamitvā aññatra vasantā "kadā nu gamissantī"ti dūrato olokenti, evameva devatā attano attano vimānāni chaḍḍetvā ito cito ca vicarantiyo dūratova olokenti "kadā nu kho bhaddantā gamissantī"ti tato evaṃ samacintesuṃ "paṭhamavassūpagatā bhikkhū avassaṃ temāsaṃ vasissanti, mayaṃ pana tāva ciraṃ dārake gahetvā okkamma vasituṃ na sikkhissāma, handa mayaṃ bhikkhūnaṃ bhayānakaṃ ārammaṇaṃ dassemā"ti. Tā ca rattiṃ bhikkhūnaṃ samaṇadhammakaraṇavelāya bhiṃsanakāni yakkharūpāni nimminitvā purato purato tiṭṭhanti, bheravasaddañca karonti. Bhikkhūnaṃ tāni rūpāni passantānaṃ tañca saddaṃ suṇantānaṃ hadayaṃ phandi. Dubbaṇṇā ca ahesuṃ uppaṇḍuppaṇḍukajātā, tena te bhikkhū cittaṃ ekaggaṃ nāsakkhiṃsu kātuṃ. Tesaṃ tesaṃ anekaggacittānaṃ tesaṃ bhayena ca punappunaṃ saṃviggānaṃ sati pammussati, tato nesaṃ muṭṭhassatīnaṃ duggandhāni ārammaṇāni payojesuṃ. Tesaṃ tena duggandhena nimmathiyamānamiva matthaluṅgaṃ ahosi, bāḷhasīsavedanā uppajjiṃsu, na ca taṃ pavattiṃ aññamaññassa ārocesuṃ.

Athekadivasaṃ saṃghattherassa upaṭṭhānakāle sabbesu sannipatitesu saṃghatthero pucchi "tumhākaṃ āvuso imaṃ vanasaṇḍaṃ pavisantānaṃ katipāhaṃ ativiya parisuddho

@3 cha.Ma. ca-saddo na dissati 4 cha.Ma. ayaṃ pāṭho na dissati