@5 cha.Ma. sammussi 6 cha.Ma. paviṭṭhānaṃ Chavivaṇṇo ahosi pariyodāto, vippasannāni ca indriyāni, etarahi panettha kisā dubbaṇṇā uppaṇḍuppaṇḍukajātā, kiṃ vo idha asappāyan"ti tato eko bhikkhu āha "ahaṃ bhante rattiṃ īdisañca īdisañca bheravārammaṇaṃ passāmi ca suṇāmi ca, īdisañca gandhaṃ ghāyāmi, tena me cittaṃ na samādhiyatī"ti. Eteneva upāyena sabbe taṃ pavattiṃ ārocesuṃ. Saṃghatthero āha "bhagavatā āvuso dve vassūpanāyikā paññattā, amhākañca imaṃ senāsanaṃ asappāyaṃ, āyāmāvuso bhagavato santikaṃ, gantvā aññaṃ sappāyaṃ senāsanaṃ pucchāmā"ti. "sādhu bhante"ti te bhikkhū therassa paṭissuṇitvā sabbeva senāsanaṃ saṃsāmetvā pattacīvaramādāya anupalitattā kulesu kañci anāmantetvā eva yena sāvatthi tena cārikaṃ pakkamiṃsu. Te anupubbena sāvatthiṃ gantvā bhagavato santikaṃ agamaṃsu.

Bhagavā te bhikkhū disvā etadavoca "na bhikkhave antovassaṃ cārikā caritabbāti mayā sikkhāpadaṃ paññattaṃ, kissa tumhe cārikaṃ carathā"ti. Te bhagavato sabbaṃ ārocesuṃ. Bhagavā āvajjento sakalajambudīpe antamaso catuppādapīṭhakaṭṭhānamattampi tesaṃ sappāyasenāsanaṃ nāddasa. Atha te bhikkhū āha "na bhikkhave tumhākaṃ aññaṃ sappāyasenāsanaṃ atthi, tattheva tumhe viharantā āsavakkhayaṃ pāpuṇeyyātha, gacchatha bhikkhave tameva senāsanaṃ upanissāya viharatha, sace pana devatāhi abhayaṃ icchatha, imaṃ parittaṃ uggaṇhatha, etañhi vo parittañca kammaṭṭhānañca bhavissatī"ti imaṃ suttaṃ abhāsi.

Apare panāhu:- "gacchatha bhikkhave tameva senāsanaṃ upanissāya viharathā"ti idañca vatvā bhagavā āha "apica kho āraññakena pariharaṇaṃ ñātabbaṃ.