@5 dī.mahā. 10/374/248, Ma.mū. 12/107/77, abhi.vi. 35/508/294 Yathāsukhaṃ aññataraaññatarairiyāpathabādhanavinodanaṃ karonto tiṭṭhaṃ vā caraṃ vā nisinno vā sayāno vā yāvatā vigatamiddho assa, atha etaṃ mettajjhānassatiṃ adhiṭṭheyya.
Atha vā evaṃ mettābhāvanāya vaḍḍhanaṃ dassetvā idāni vasībhāvaṃ dassento āha "tiṭṭhañcaran"ti. Vasībhāvappatto hi tiṭṭhaṃ vā caraṃ vā nisinno vā sayāno vā yāvatā iriyāpathena etaṃ mettajjhānassatiṃ adhiṭṭhātukāmo hoti, atha vā tiṭṭhaṃ caraṃ nisinnoti na tassa ṭhānādīni antarāyakarāni honti. Apica kho so yāvatā etaṃ mettajjhānassatiṃ adhiṭṭhātukāmo hoti, tāvatā vigatamiddho hutvā. Adhiṭṭhāti, natthi tassa tattha bandhāyitattaṃ. Tenāha "tiṭṭhañcaraṃ nisinno vā sayāno vā yāvatassa vigatamiddho. Etaṃ satiṃ adhaṭṭheyyā"ti
tassāyaṃ adhippāyo:- yantaṃ "mettañca sabbalokasmiṃ, mānasaṃ bhāvaye"ti vuttaṃ, taṃ tathā bhāvaye, yathā ṭhānādīsu yāvatā iriyāpathena, ṭhānādīni vā anādiyitvā yāvatā etaṃ mettajjhānassatiṃ adhiṭṭhātukāmo assa, tāvatā vigatamiddho hutvā etaṃ satiṃ adhiṭṭheyyāti.
Evaṃ mettābhāvanāya vasībhāvaṃ dassento "etaṃ satiṃ adhiṭṭheyyā"ti tasmiṃ mettāvihāre niyojetvā idāni taṃ vihāraṃ thunanto āha brahmametaṃ vihāraṃ idhamāhū"ti.