Tathā yampi taṃ anomasattaparibhogaṭṭhena ratanaṃ. Seyyathīdaṃ? rañño Cakkavattissa cakkaratanādi. Tañhi koṭisatasahassadhanānampi sattabhūmipāsādavaratale nivasantānampi caṇḍālaveṇanesādarathakārapukkusādīnaṃ nīcakulikānaṃ omakapurisānaṃ supinantenāpi paribhogatthāya na nibbattati. Ubhato sujātassa pana rañño cakkavattisseva paripūritadasavidhacakkavattivattassa paribhogatthāya nibbattanato anomasattaparibhogaṃyeva hoti tampi buddharatanasamaṃ natthi. Yadi hi anomasattaparibhogaṭṭhena ratanaṃ, tathāgatova ratanaṃ. Tathāgato hi loke omakasattasammatānampi anupanissayasampannānaṃ viparītadassanānaṃ pūraṇakassapādīnaṃ channaṃ satthārānaṃ aññesañca evarūpānaṃ supinantenāpi aparibhogo. Upanissayasampannānañca pana catuppadāyapi gāthāya pariyosāne arahattamadhigantuṃ samatthānaṃ nibbedhikaññāṇa- dassanānaṃ bāhiyadārucīriyappabhūtīnaṃ aññesañca mahākulappasutānaṃ mahāsāvakānaṃ paribhogo, te hi taṃ dassanānuttariyasavanānuttariyapāricariyānuttariyādīni sādhentā tathāgataṃ paribhuñjanti. Evaṃ anomasattaparibhogaṭṭhenāpi tathāgatasamaṃ ratanaṃ natthi.

Yampi taṃ avisesato ratijananaṭṭhena ratanaṃ. Seyyathāpi? rañño Cakkavattissa cakkaratanaṃ. Taṃ hi disvāva rājā cakkavattī attamano hoti, evaṃpi taṃ rañño ratiṃ janeti. Puna ca paraṃ rājā cakkavattī vāmena hatthena

@4 dī. mahā. 10/200/122 5 cha.Ma. vasantānampi 6 cha.Ma., i. supinantepi