Evaṃ anāgārikaratanampi dubbidhaṃ ariyaputhujjanavasena. Ariyaratanampi dubbidhaṃ sekkhāsekkhavasena. Asekkharatanampi dubbidhaṃ sukkhavipassakasamathayānikavasena. Samathayānikaratanampi dubbidhaṃ sāvakapāramippattamappattañca. Tattha sāvakapāramippattaṃ aggamakkhāyati. Kasmā? guṇamahantatāya. Sāvakapāramippattaratanatopi paccekabuddharatanaṃ aggamakkhāyati. Kasmā? guṇamahantatāya. Sāriputtamoggallānasadisāpi hi anekasatā sāvakā ekassa paccekasambuddhassa guṇānaṃ neva saṅkhaṃ na kalaṃ na kalabhāgampi upenti. Paccekasambuddharatanatopi sammāsambuddharatanampi aggamakkhāyati. Kasmā? guṇamahantatāya. Yadi hi sakalampi jambūdīpaṃ pūretvā pallaṅkena pallaṅkaṃ Ghaṭentā nisinnāpi paccekasambuddhā ekassa sammāsambuddhassa guṇānaṃ neva saṅkhaṃ na kalaṃ na kalabhāgaṃ upenti. Vuttampi cetaṃ bhagavatā "yāvatā bhikkhave sattā apadā vā dipadā vā .pe. Tathāgato tesaṃ aggamakkhāyatī"ti ādi. Evaṃ kenaci pariyāyena tathāgataratanasamaṃ ratanaṃ natthi. Tenāha bhagavā "na no samaṃ atthi tathāgatenā"ti.

Evaṃ bhagavā buddharatanassa aññehi ratanehi asamataṃ vatvā idāni tesaṃ sattānaṃ uppannūpaddavavūpasamanatthaṃ neva jātiṃ na gottaṃ na kolaputtiyaṃ na vaṇṇapokkharatādīni nissāya, apica kho avīcimupādāya bhavaggapariyante loke sīlasamādhikkhandhādīhi guṇehi buddharatanassa asadisabhāvaṃ nissāya saccavacanaṃ payuñjati "idampi buddhe ratanaṃ paṇītaṃ, etena saccena suvatthi hotū"ti.

Tassattho:- idampi idha vā huraṃ vā saggesu vā yaṃkiñci atthi vittaṃ vā ratanaṃ vā, tena saddhiṃ tehi tehi guṇehi asamattaṃ buddhe ratanaṃ paṇītaṃ. Yadi etaṃ saccaṃ, atha etena saccena imesaṃ pāṇīnaṃ sotthi hotu. Sobhaṇānaṃ atthitā hotu arogatā nirupaddavatāti. Ettha ca yathā "cakkhuṃ