Yambuddhaseṭṭhoti gāthāvaṇṇanā

[5] Evaṃ nibbānadhammaguṇena saccaṃ vatvā idāni maggadhammaguṇena vattumāraddho "yambuddhaseṭṭho"ti.

Tattha "bujjhitā saccānī"ti ādinā nayena buddho, uttamo pasaṃsanīyo cāti seṭṭho, buddho ca so seṭṭho cāti buddhaseṭṭho. Anubuddha- paccekabuddhākhyesu vā buddhesu seṭṭhoti buddhaseṭṭho. So buddhaseṭṭho yaṃ parivaṇṇayi "aṭṭhaṅgiko ca maggānaṃ, khemaṃ nibbānapattiyā"ti ca "ariyaṃ vo bhikkhave sammāsamādhiṃ desessāmi saupanisaṃ saparikkhāran"ti ca evamādinā nayena tattha tattha pasaṃsi pakāsayi. Sucinti kilesamalasamucchedakaraṇato accantavodānaṃ. Samādhimānantarikaññamāhūti yañca attano pavattisamanantaraṃ niyameneva phalappadānato "ānantarikasamādhī"ti āhu. Na hi maggasamādhimhi uppanne tassa phaluppattinisedhako koci antarāyo atthi. Yathāha:-

"ayañca puggalo sotāpattiphalasacchikiriyāya paṭipanno assa, kappassa