Saggesu vāti kāmāvacararūpāvacaradevalokesu. Te hi sobhanena kammena irīyanti gammantīti saggā, suṭṭhu vā aggātipi saggā. Yanti yaṃ sassāmikaṃ vā assāmikaṃ vā. Ratananti ratiṃ nayati vahati janayati vaḍḍhetīti ratanaṃ, yaṃ kiñci cittīkataṃ mahagghaṃ atulaṃ dullabhadassanaṃ anomasattaparibhogañca, tassetaṃ adhivacanaṃ. Yathāha:-

"cittīkataṃ mahagghañca atulaṃ dullabhadassanaṃ

anomasattaparibhogaṃ ratanaṃ tena vuccatī"ti.

Paṇītanti seṭṭhaṃ uttamaṃ anappakaṃ manāpaṃ. Evaṃ iminā gāthāpadena yaṃ saggesu anekayojanasatappamāṇasabbaratanamayavimānasudhammavejayantappabhutīsu