Tassattho purimagāthāya vuttanayeneva veditabbo. Imissāpi gāthāya āṇā koṭisatasahassacakkavāḷesu amanussehi paṭiggahitāti.

[228] Evaṃ nibbānadhammaguṇena saccaṃ vatvā idānipi maggadhammaguṇena vattumāraddho "yambuddhaseṭṭho"ti. Tattha "bujjhitā saccānī"tiādinā nayena buddho, uttamo pasaṃsanīyo vāti seṭṭho, buddho ca so seṭṭho cāti buddhaseṭṭho. Anubuddhapaccekabuddhasaṅkhātesu vā buddhesu seṭṭhoti buddhaseṭṭho. So buddhaseṭṭho yaṃ parivaṇṇayī, "aṭṭhaṅgiko ca maggānaṃ, khemaṃ nibbānapattiyā"ti ca "ariyaṃ vo bhikkhave sammāsamādhiṃ desessāmi saupanisaṃ saparikkhāranti ca evamādinā nayena tattha tattha pasaṃsi pakāsayi. Sucinti kilesamala samucchedakaraṇato accantavodānaṃ. Samādhimānantarikaññamāhūti yañca attano pavattisamanantaraṃ niyameneva phaladānato "ānantarikasamādhī"ti āhu. Na hi maggasamādhimhi uppanne tassa phaluppattinisedhako koci antarāyo atthi. Yathāha:-

@3 khu.cūḷa. 30/546/271 (syā), khu.paṭi. 31/162/185 4 Ma.Ma. 13/215/191