@3 cha.Ma. avitakkavicāramatte 4 cha.Ma. opammavacanaṃ

@ 5 Sī. gimhānamāsā, Ma. gimhānaṃ māsā

@6 Sī. nānāvidharukkhegahanavane 7 cha.Ma. kevalaṃ hi Tassattho pubbe vuttanayeneva veditabbo, kevalaṃ pana idampi yathāvuttappakāraṃ pariyattidhammasaṅkhātaṃ buddhe ratanaṃ paṇītanti evaṃ yojetabbaṃ. Imissāpi gāthāya āṇā koṭisatasahassacakkavāḷesu amanussehi paṭiggahitāti.

[237] Evaṃ bhagavā pariyattidhammena buddhādhiṭṭhānaṃ saccaṃ vatvā idāni lokuttaradhammena vattumāraddho "varo varaññū"ti. Tattha varoti paṇītādhimuttikehi icchito "aho vata mayampi evarūpā assāmā"ti, varaguṇayogato vā varo, uttamo seṭṭhoti attho. Varaññūti nibbānaññū. Nibbānaṃ hi sabbadhammānaṃ uttamaṭṭhena varaṃ, taṃ cesa bodhimūle sayaṃ paṭivijjhitvā aññāsi. Varadoti pañcavaggiyabhaddavaggiyajaṭilādīnaṃ aññesañca devamanussānaṃ nibbedhabhāgiyaṃ vā vāsanābhāgiyaṃ vā varadhammamadāsīti attho. Varāharoti varassa maggassa āhaṭattā varāharoti vuccati. So hi bhagavā dīpaṅkarato pabhuti samatiṃsa pāramiyo pūrento pubbakehi sammāsambuddhehi anuyātaṃ purāṇamaggavaramāhari, tena varāharoti vuccati. Apica sabbaññutaññāṇapaṭilābhena varo, nibbānasacchikiriyāya varaññū, sattānaṃ vimuttisukhādānena varado, uttamapaṭipadāharaṇato varāharo. Etehi lokuttaraguṇehi adhikassa kassaci abhāvato anuttaro.