So sajjhāyaṃ karonto ādimajjhaṃyevassa passati, no pariyosānaṃ. Atha ācariyaṃ upasaṅkamitvā āha "imassa sippassa ādimajjhameva passāmi, pariyosānaṃ na passāmī"ti ācariyo āha "ahampi tāta evamevā"ti. Atha ko ācariya imassa sippassa pariyosānaṃ jānātīti. Isipatane tāta isayo atthi, te jāneyyunti. Te upasaṅkamitvā pucchāmi ācariyāti. Puccha tāta yathāsukhanti. So isipatanaṃ gantvā paccekabuddhe upasaṅkamitvā pucchi "ādimajjhapariyosānaṃ jānāthā"ti. Āmāvuso jānāmāti. Taṃ mampi sikkhāpethāti. Tena hāvuso pabbajāhi, na sakkā apabbajitena sikkhitunti. Sādhu bhante pabbājetha vā maṃ, yaṃ vā icchatha, taṃ katvā pariyosānaṃ jānāpethāti. Te pabbājetvā kammaṭṭhāne niyojetuṃ asamatthā "evaṃ te nivāsetabbaṃ, evaṃ pārupitabban"ti- ādinā nayena ābhisamācārikaṃ sikkhāpesuṃ. So ca tattha sikkhanto upanissayasampannattā acireneva paccekabodhiṃ abhisambujjhi. Sakalabārāṇasiyaṃ "susīmapaccekabuddhoti pākaṭo ahosi lābhaggayasaggappatto sampannaparivāro. So appāyukasaṃvattaniyassa kammassa katattā na cireneva parinibbāyi, tassa paccekabuddhā ca mahājanakāyo ca sarīrakiccaṃ katvā dhātuyo gahetvā nagaradvāre thūpaṃ patiṭṭhāpesuṃ.

Atha kho saṅkho brāhmaṇo "putto me ciraṃ gato na cassa pavattiṃ jānāmī"ti puttaṃ daṭṭhukāmo takkasilāya nikkhamitvā anupubbena bārāṇasiṃ patvā mahājanakāyaṃ sannipatitaṃ disvā "addhā bahūsu janakāyesu ekopi me puttassa pavattiṃ jānissatī"ti cintento tattha upasaṅkamitvā pucchi "susīmo

@ 2 cha.Ma. casaddo na dissati 3 cha.Ma. janakāyesūti na dissati