Bārāṇasito bhanteti. Kā tattha pavattīti. Tattha bhante kassapo nāma sammāsambuddho uppannoti. Tāpaso dullabhasavanaṃ sutvā pītisomanassajāto pucchi "kiṃ so āmagandhaṃ bhuñjati, na bhuñjatī"ti. Ko bhante āmagandhoti. Macchamaṃsaṃ āvusoti. Bhagavā bhante macchamaṃsaṃ bhuñjatīti. Taṃ sutvā tāpaso vippaṭisārī hutvā puna cintesi "gantvā taṃ pucchissāmi, sace `āmagandhaṃ paribhuñjāmī'ti vakkhati, tato naṃ `tumhākaṃ bhante jātiyā ca kulassa ca gottassa ca ananucchavikametan'ti nivāretvā tassa santike pabbajitvā bhavanissaraṇaṃ karissāmī"ti. Sallahukaṃ upakaraṇaṃ gahetvā sabbattha ekarattivāsena sāyanhasamaye bārāṇasiṃ patvā isipatanameva pāvisi. Bhagavāpi tasmiṃ samaye dhammadesanatthāya āsane nisinnoyeva ahosi. Tāpaso bhagavantaṃ upasaṅkamma anabhivādetvā tuṇhībhūto ekamantaṃ aṭṭhāsi, bhagavā taṃ disvā pubbe vuttanayeneva paṭisammodi. Sopi "khamanīyaṃ bho kassapā"tiādīni vatvā ekamantaṃ nisīditvā bhagavantaṃ pucchi "āmagandhaṃ bho kassapa bhuñjasi, na bhuñjasī"ti. Nāhaṃ brāhmaṇa āmagandhaṃ bhuñjāmīti. Sādhu sādhu bho kassapa parakuṇapaṃ akhādanto sundaramakāsi, yuttametaṃ bhoto kassapassa jātiyā ca kulassa ca gottassa cāti. Tato bhagavā "kilese sandhāya `āmagandhaṃ na bhuñjāmī'ti vadāmi, brāhmaṇo macchamaṃsaṃ pacceti, yannūnāhaṃ sve gāmaṃ piṇḍāya apavisitvā kiṃkirañño gehā ābhataṃ piṇḍapātaṃ paribhuñjeyyaṃ, evaṃ āmagandhaṃ ārabbha kathā pavattissati, tato brāhmaṇaṃ dhammadesanāya saññāpessāmī"ti dutiyadivase kālasseva sarīraparikammaṃ katvā gandhakuṭiṃ pāvisi. Bhikkhū gandhakuṭidvāraṃ pihitaṃ disvā "na bhagavā ajja bhikkhūhi saddhiṃ pavisitukāmo"ti ñatvā gandhakuṭiṃ padakkhiṇaṃ katvā piṇḍāya pavisiṃsu.