[248] Evaṃ puggalādhiṭṭhānāya desanāya dve gāthāyo vatvā puna tassa tāpasassa āsayānuparivattanaṃ viditvā dhammādhiṭṭhānāyeva desanāya ekaṃ gāthamabhāsi. Tattha kodho uragasutte vuttanayeneva veditabbo. Madoti "jātimado gottamado ārogyamado"tiādinā nayena vibhaṅge vuttappabhedo cittassa majjanabhāvo. Thambhoti thaddhabhāvo. Paccupaṭṭhāpanāti paccanīkaṭṭhāpanā dhammena nayena vuttassa paṭivirujjhitvā ṭhānaṃ. Māyāti "idhekacco kāyena duccaritaṃ caritvā"tiādinā nayena vibhaṅge vibhattā katapāpapaṭicchādanatā. Ussuyāti paralābhasakkārādīsu issāyanā. Bhassasamussayoti samussitaṃ bhassaṃ, attukkaṃsanatāti vuttaṃ hoti. Mānātimānoti "idhekacco jātiyā vā .pe. Aññataraññatarena vatthunā pubbakālaṃ parehi sadisaṃ attānaṃ dahati, aparakālaṃ attānaṃ seyyaṃ dahati, [parehi hīnaṃ na dahati,] yo evarūpo māno .pe. Ketukamyatā cittassāti vibhaṅge vibhatto. Asabbhi santhavoti asappurisehi santhavo. Esāmagandho na hi maṃsabhojananti esa kodhādi navavidho akusalarāsi pubbe vuttenevatthena āmagandhoti veditabbo, na hi maṃsabhojananti.

[249] Evaṃ dhammādhiṭṭhānāya desanāya navavidhaṃ āmagandhaṃ dassetvā punapi pubbe vuttanayeneva puggalādhiṭṭhānāya desanāya āmagandhe vissajjento

@3 abhi.vi. 35/832/421 4 Sī. paccuṭṭhapanāti 5 Ma. paccanīkūpaṭṭhānā