@3 cha.Ma. iriyāpathasampadādīhi 4 Sī. sīlavantapaṭirūpatā, i. sīlabattaṃ paṭirūpaṃ

@5 cha.Ma.,i. karonti 6 cha.Ma.,i. tesaṃ Na karissāma, viramissāma evaṃrūpā"ti evaṃ ādaravirahitā. Esāmagandho na hi maṃsabhojananti esa etāya gāthāya puggale adhiṭṭhāya niddiṭṭho "pāṇātipāto vadhacchedabandhanan"tiādinā nayena pubbe vutto ca avutto ca "pāṇesu asaṃyatatā paresaṃ vihesatā dussīlatā luddatā pharusatā anādaratā"ti chabbidho āmagandho veditabbo, na hi maṃsabhojananti. Pubbe vuttampi hetaṃ na sotukāmatāya avadhāraṇatāya daḷhīkaraṇatāyāti evamādīhi kāraṇehi puna vuccati. Teneva ca parato vakkhati "iccetamatthaṃ bhagavā punappunaṃ, akkhāsi naṃ vedayi mantapāragū"ti.

[251] Etesu giddhā viruddhātipātinoti etesu pāṇesu gedhena giddhā, dosena viruddhā, mohena ādīnavaṃ apassantā punappunaṃ ajjhācārappattiyā atipātino ca, etesu vā "pāṇātipāto vadhacchedabandhanan"tiādinā nayena vuttesu pāpakammesu yathāsabhāvaṃ ye gedhavirodhātipātasaṅkhātā rāgadosamohā, heti giddhā viruddhā atipātino ca. Niccuyyutāti akusale niccaṃ uyyuttā, kadāci paṭisaṅkhāya appaṭiviratā. Peccāti asmā lokā paraṃ lokaṃ gantvā. Tamaṃ vajanti ye, patanti sattā nirayaṃ avaṃsirāti ye lokantarikandhakārasaṅkhātaṃ nīcakulīnatādibhedaṃ vā tamaṃ vajanti, ye ca patanti sattā avīciādibhedaṃ nirayaṃ avaṃsirā adhogatasīsā. Esāmagandhoti tesaṃ sattānaṃ tamavajananirayapatanahetu esa gedhavirodhātipātabhedo sabbāmagandhamūlabhūto yathāvuttenatthena tividho āmagandho. Na hi maṃsabhojananti maṃsabhojanaṃ pana na āmagandhoti.