@3-3 cha.Ma.,i. vuttampi hi sotūnaṃ sotukāmatāya 4 Sī. daḷhīkaraṇatthāyāti

@5 cha.Ma.,i. casaddo na dissati 6 cha.Ma.,i. akusalakaraṇe

@7 cha.Ma.,i. lokanti na dissati 8 cha.Ma. nīcakulatādibhedaṃ

[252] Evaṃ bhagavā paramatthato āmagandhaṃ vissajjetvā duggatimaggabhāvañcassa pakāsetvā idāni yasmiṃ macchamaṃsabhojane tāpaso āmagandhasaññī duggatimaggasaññī ca hutvā tassa abhojanena suddhikāmo hutvā taṃ na bhuñjati, tassa ca aññassa ca tathāvidhassa visodhetuṃ asamatthabhāvaṃ dassento "na macchamaṃsan"ti imaṃ chappadaṃ gāthamāha. Tattha sabbapadāni antimapadena yojetabbāni:- na macchamaṃsaṃ sodheti maccaṃ avitiṇṇakaṅkhaṃ, na āhutiyaññamutūpasevanā sodhenti maccaṃ avitiṇṇakaṅkhanti evaṃ. Ettha ca macchamaṃsanti akhādiyamānaṃ macchamaṃsaṃ na sodheti, tathā anāsakattanti evaṃ porāṇā vadanti. Evaṃ pana sundarataraṃ siyā "na macchamaṃsānaṃ anāsakattaṃ na macchamaṃsānānāsakattaṃ, macchamaṃsānaṃ anāsakattaṃ na sodheti maccan"ti. Athāpi siyā, evaṃ sante anāsakattaṃ ohīyatīti? taṃ ca na, amaratapena saṅgahitattā. "ye vāpi loke amarā bahū tapā"ti ettha hi sabbopi vuttāvaseso attakilamatho saṅgahaṃ gacchatīti. Na naggiyanti acelakattaṃ. Muṇḍiyanti muṇḍabhāvo. Jaṭājallanti jaṭā ca rajojallañca. Kharājinānīti kharāni ajinacammāni. Aggihutassupasevanāti aggipāricariyā. Amarāti amarabhāvapatthatāya pavattā kāyakilesā. Bahūti ukkuṭikappadhānādibhedato aneke. Tapāti sarīrasantāpā. Mantāti vedā. Āhutīti aggihomakammaṃ. Yaññamutūpasevanāti assamedhādiyaññā ca utūpasevanā ca. Utūpasevanā nāma gimhe ātapaṭṭhānasevanā, vasse rukkhamūlasevanā, hemante jalappavesasevanā. Na sodheti maccaṃ avitiṇṇakaṅkhanti kilesasuddhiyā vā